అచ్చంపేట మార్కెట్ యార్డులో భారీ దొంగతనం: రైతుకు చెందిన 107 మక్కల బస్తాలు మాయం!

29, May 2026 Achampet 176 Views

అచ్చంపేట అగ్రికల్చర్ మార్కెట్ యార్డులో భారీ దొంగతనం.. రైతుకు చెందిన 107 మక్కల బస్తాలు మాయం!

అచ్చంపేట: నాగర్‌కర్నూలు జిల్లా అచ్చంపేట పట్టణ పరిధిలోని ప్రభుత్వ వ్యవసాయ మార్కెట్ యార్డులో భద్రతా లోపాలు మరోసారి బయటపడ్డాయి. మార్కెట్ యార్డుకు అమ్మకం నిమిత్తం తెచ్చిన ఒక నిరుపేద రైతుకు చెందిన ఏకంగా 107 మక్కల (మొక్కజొన్న) ధాన్యం బస్తాలు రాత్రికి రాత్రే దొంగతనానికి గురికావడం స్థానికంగా తీవ్ర కలకలం రేపింది.
బాధిత రైతు తెలిపిన వివరాల ప్రకారం.. అచ్చంపేట నియోజకవర్గానికి చెందిన రైతు మంత్రాల జితేందర్ తాను పండించిన మక్కల ధాన్యాన్ని బస్తాల్లో నింపి అచ్చంపేట మార్కెట్ యార్డుకు తీసుకువచ్చారు. మంగళవారం మధ్యాహ్నం వరకు మార్కెట్ ప్రాంగణంలోనే ఆ బస్తాల కుప్ప సురక్షితంగా ఉంది. అనంతరం రైతు వ్యక్తిగత పని నిమిత్తం తన ఇంటికి వెళ్లి, మరుసటి రోజు (బుధవారం) మధ్యాహ్నం వచ్చి చూసేసరికి అక్కడ ఉన్న 107 మక్కల సంచులు పూర్తిగా మాయమయ్యాయి.

కన్నీరుమున్నీరైన రైతు – పోలీసులకు ఫిర్యాదు: మార్కెట్ యార్డులో చాలా రోజులుగా నిల్వ ఉంచిన తన ధాన్యం బస్తాలు ఒక్కసారిగా కనిపించకుండా పోవడంతో రైతు జితేందర్ ఒక్కసారిగా షాక్‌కు గురై అక్కడే కుప్పకూలిపోయారు. "నాలుగు నెలల పాటు రాత్రింబవళ్లు కష్టపడి, చెమటోడ్చి పండించిన పంటను అదును చూసి గుర్తుతెలియని వ్యక్తులు దొంగిలించారు. కళ్లముందే నా కష్టం కొల్లబోయింది" అంటూ ఆ రైతు కన్నీరుమున్నీరవుతున్నారు.

ఈ భారీ చోరీ ఘటనపై బాధిత రైతు అచ్చంపేట స్థానిక పోలీస్ స్టేషన్‌లో రాతపూర్వకంగా ఫిర్యాదు చేశారు. మార్కెట్ యార్డులోని సీసీటీవీ ఫుటేజీలను పరిశీలించి, దోషులను త్వరితగతిన పట్టుకుని కఠినంగా శిక్షించాలని, అలాగే తన పంటను తనకు దక్కేలా న్యాయం చేయాలని పోలీసులను వేడుకున్నారు. ప్రభుత్వ మార్కెట్ యార్డులోనే రైతులకు రక్షణ లేకపోతే ఎలా అని స్థానిక రైతులు ప్రశ్నిస్తున్నారు.