అచ్చంపేట: తెలంగాణ విద్యా పరిరక్షణ కమిటీ పోస్టర్ రిలీజ్ చేసిన జక్క రామస్వామి

25, May 2026 Achampet 176 Views

అచ్చంపేటలో ‘తెలంగాణ విద్యా పరిరక్షణ కమిటీ’ పోస్టర్ ఆవిష్కరణ.. జూన్ 5న ఇందిరా పార్కు వద్ద మహా ధర్నా!

అచ్చంపేట: తెలంగాణ రాష్ట్రంలో విద్యా రంగాన్ని రక్షించుకోవడానికి, ప్రభుత్వ విద్యను బలోపేతం చేయడమే ధ్యేయంగా జూన్ 5న హైదరాబాద్‌లో భారీ విద్యా ఉద్యమానికి శంఖారావం పూరించారు. నాగర్‌కర్నూలు జిల్లా తెలంగాణ విద్యా పరిరక్షణ కమిటీ అధ్యక్షులు జక్క రామస్వామి ఆధ్వర్యంలో సోమవారం సాయంత్రం 5 గంటలకు అచ్చంపేట పట్టణంలోని తెలంగాణ అమరవీరుల స్థూపం వద్ద విద్యా పరిరక్షణ కమిటీ అధికారిక గోడ పత్రికను ఘనంగా ఆవిష్కరించారు.

ఈ సందర్భంగా కమిటీ జిల్లా అధ్యక్షులు జక్క రామస్వామి మాట్లాడుతూ.. ప్రస్తుతం తెలంగాణ రాష్ట్రంలో విద్యా రంగం తీవ్రమైన సంక్షోభంలో కొట్టుమిట్టాడుతోందని ఆవేదన వ్యక్తం చేశారు. ప్రభుత్వ విద్యను కాపాడుకోవడానికి రాష్ట్రంలోని ఉద్యోగులు, ఉపాధ్యాయులు, విద్యాభిమానులు, మేధావులు, విద్యార్థులు మరియు తల్లిదండ్రులు అందరూ ఏకమై పోరాడాల్సిన సమయం ఆసన్నమైందని పిలుపునిచ్చారు.

కేంద్రంలోని బీజేపీ ప్రభుత్వం 'నూతన జాతీయ విద్యా విధానం' (NEP) పేరుతో విద్యను కాషాయీకరణ, కార్పొరేటీకరణ, మరియు కేంద్రీకరణ చేస్తూ బడుగు, బలహీన, పేద వర్గాలకు చదువును దూరం చేసే కుట్రకు తెరలేపిందని మండిపడ్డారు. మరోవైపు, తెలంగాణ రాష్ట్రంలో ప్రజాపాలన అందిస్తామన్న కాంగ్రెస్ ప్రభుత్వం కూడా తెలంగాణ పబ్లిక్ స్కూళ్లు, ఇంటిగ్రేటెడ్ పాఠశాలల పేరుతో సరికొత్త కార్పొరేటీకరణకు బీజం వేస్తోందని ఆరోపించారు. ఈ విధానాల వల్ల కేవలం కొంతమంది విద్యార్థులకే నాణ్యమైన చదువు అందుతుందని, ఇది సరైన పద్ధతి కాదన్నారు.

ప్రభుత్వ పాఠశాలల్లో ఉన్న మొత్తం విద్యార్థులందరికీ సమానంగా నాణ్యమైన, గుణాత్మకమైన విద్యను అందించాలని జక్క రామస్వామి డిమాండ్ చేశారు. ఇందుకోసం ప్రభుత్వ పాఠశాలలను సెమీ రెసిడెన్షియల్ పాఠశాలలుగా ప్రకటిస్తూ, సర్కారు బడులను బలోపేతం చేసే దిశగా నిర్ణయాలు తీసుకోవాలన్నారు. అంతిమంగా ప్రభుత్వ విద్యా రంగాన్ని కాపాడుకునేందుకు జూన్ 5, 2026 నాడు హైదరాబాద్‌లోని ఇందిరా పార్క్ వద్ద నిర్వహించే భారీ ‘ధర్నా-ర్యాలీ’ కార్యక్రమాన్ని విజయవంతం చేయాలని కోరారు.

ఈ పోస్టర్ ఆవిష్కరణ కార్యక్రమంలో కమిటీ ప్రతినిధులు డిటి నాయక్, మోతిరాం, విజయ్, శ్రీశైలం, రామకోటి, లక్ష్మీనారాయణ, జనార్ధన్, సురేష్, వెంకటేష్, శ్రీను తదితర విద్యావంతులు, నాయకులు పాల్గొన్నారు.