News Home
అడవిలో ఎలుగుబంటి ఘోర దాడి: చెంచు మహిళకు తీవ్ర గాయాలు!

అడవిలో ఎలుగుబంటి ఘోర దాడి: చెంచు మహిళకు తీవ్ర గాయాలు!

24, May 2026 Balmoor 176 Views

Wild Bear Attacks Chenchu Woman in Balmoor Forest; Hospitalized in Achampet

మేకల కాపలాకు వెళ్లిన సమయంలో ప్రమాదం

సకాలంలో స్పందించి ఆసుపత్రికి తరలించిన అటవీశాఖ అధికారులు

సరిహద్దు గ్రామాల ప్రజలు అప్రమత్తంగా ఉండాలని ఎఫ్‌డీఓ చంద్రశేఖర్ ఆదేశం

బల్మూర్, మే 24

బల్మూర్ మండల పరిధిలో ఆదివారం మధ్యాహ్నం ఘోర ప్రమాదం చోటుచేసుకుంది. నల్లమల అటవీ ప్రాంతంలో మేకల కాపలాకు వెళ్లిన ఒక చెంచు మహిళపై ఎలుగుబంటి దాడి చేసి తీవ్రంగా గాయపరిచింది.

స్థానికులు మరియు అటవీశాఖ అధికారులు తెలిపిన వివరాల ప్రకారం.. చెంచుగూడెం గ్రామానికి చెందిన నిమ్మల సాలమ్మ (భర్త నిమ్మల రాములు) రోజువారీలాగే ఆదివారం మధ్యాహ్నం కొండనాగుల ఈస్ట్ బీట్ పరిధిలోని ‘పవన కుంట’ అటవీ ప్రాంతానికి మేకల కాపలా కోసం వెళ్లారు. అదే సమయంలో తన పిల్లలతో కలిసి సంచరిస్తున్న ఒక ఎలుగుబంటి ఒక్కసారిగా సాలమ్మపై విరుచుకుపడింది. ఈ అకస్మాత్తు దాడిలో ఆమెకు తీవ్ర గాయాలు కావడంతో అక్కడికక్కడే కుప్పకూలిపోయారు.

సమాచారం అందుకున్న వెంటనే అటవీశాఖ డిప్యూటీ రేంజ్ ఆఫీసర్ మల్లేశం, ఫారెస్ట్ బీట్ ఆఫీసర్లు రాజు, మీనాక్షిలు సిబ్బందితో కలిసి ఘటనా స్థలానికి చేరుకున్నారు. గాయపడిన మహిళను దట్టమైన అడవి నుంచి సురక్షితంగా బయటకు తీసుకువచ్చి, చికిత్స నిమిత్తం అచ్చంపేటలోని మహదేవ్ మల్టీ స్పెషాలిటీ ఆసుపత్రికి తరలించారు. ప్రస్తుతం ఆమెకు అత్యవసర చికిత్స అందుతోందని, ఆరోగ్య పరిస్థితి నిలకడగానే ఉందని వైద్యులు స్పష్టం చేశారు. బాధితురాలికి తక్షణ ఉపశమనం కింద అటవీశాఖ తరఫున రూ. 5,000/-ల ఆర్థిక సహాయాన్ని అందజేశారు.

ఈ ఘటనపై అచ్చంపేట ఫారెస్ట్ డివిజనల్ ఆఫీసర్ (FDO) చంద్ర శేఖర్ స్పందిస్తూ అడవి సరిహద్దు గ్రామాల ప్రజలకు కీలక హెచ్చరికలు జారీ చేశారు.

ప్రస్తుతం అటవీ ప్రాంతంలో ఎలుగుబంట్లు, పులులు, చిరుతల సంచారం ఎక్కువగా ఉంది. కాబట్టి అత్యవసర పరిస్థితులు ఉంటే తప్ప ప్రజలు అడవిలోకి వెళ్లకూడదు. ముఖ్యంగా పశువులు, మేకల పెంపకందారులు, కట్టెల సేకరణకు వెళ్లేవారు ఒంటరిగా వెళ్లకుండా సమూహాలుగా వెళ్లాలి. వన్యప్రాణులు కనిపిస్తే తక్షణమే అటవీశాఖ అధికారులకు సమాచారం అందించాలి.

ఈ ప్రమాదంతో చెంచుగూడెం మరియు పరిసర గ్రామాల్లో ఒక్కసారిగా భయాందోళనలు నెలకొన్నాయి. అధికారులు నిరంతరం నిఘా ఉంచి వన్యప్రాణుల నుంచి గ్రామస్థులను కాపాడాలని స్థానికులు కోరుతున్నారు