పిల్లల భవిష్యత్తు కోసం అడవిని వీడుతున్నాం.. స్వచ్ఛంద పునరావాసానికి చెంచుల జైహో!

27, Apr 2026 Achampet 176 Views

70 ఏళ్ల కష్టాలకు స్వస్తి.. అభివృద్ధి బాటలో నల్లమల చెంచులు! స్వచ్ఛంద పునరావాసానికి గ్రీన్ సిగ్నల్

నాగర్‌కర్నూల్: నల్లమల అటవీ అంతర్భాగంలోని మారుమూల పెంటల్లో దశాబ్దాలుగా మగ్గుతున్న చెంచు కుటుంబాలు తమ భవిష్యత్తు కోసం సంచలన నిర్ణయం తీసుకున్నాయి. నాగర్‌కర్నూల్ జిల్లాలోని సార్లపల్లి, కుడిచింతల బైలు, కొల్లంపెంట, తాటిగుండాల పెంటలకు చెందిన ప్రజలు స్వచ్ఛందంగా పునరావాసానికి (Voluntary Rehabilitation) మొగ్గు చూపారు.

పిల్లల చదువు కోసమే ఈ నిర్ణయం: వన్యప్రాణుల సంచారంతో పంట నష్టం, వైద్యం అందక ఇబ్బందులు, పిల్లలకు చదువు లేకపోవడం వంటి సమస్యలతో విసిగిపోయామని గ్రామస్తులు ఆవేదన వ్యక్తం చేశారు. "మా పిల్లలు మా లాగే అడవిలో ఇబ్బందులు పడకూడదు. వారికి మంచి విద్య, మెరుగైన జీవితం దక్కాలనే ఉద్దేశంతోనే మేము ఈ నిర్ణయం తీసుకున్నాము" అని సార్లపల్లికి చెందిన మండ్లి మల్లేష్, కుడిచింతల బైలుకు చెందిన మండ్లి బౌరమ్మ తెలిపారు. ఎవరి ఒత్తిడి లేకుండా, తమ సొంత ఇష్టంతోనే పునరావాసానికి వెళ్తున్నామని, ఈ ప్రక్రియను అడ్డుకోవాలని చూస్తే ముఖ్యమంత్రి కార్యాలయం (CMO) వరకు వెళ్లడానికైనా సిద్ధమని చిర్ర రాములు వంటి బాధితులు హెచ్చరించారు.

డీఎఫ్ఓ అభినందన: చెంచు కుటుంబాలు స్వచ్ఛందంగా ముందుకు రావడంపై జిల్లా అటవీ అధికారి (DFO) హర్షం వ్యక్తం చేశారు. పునరావాసం పొందే ప్రతి కుటుంబానికి పారదర్శకమైన పరిహారంతో పాటు ఇళ్లు, తాగునీరు, రహదారులు, విద్యా-వైద్య సదుపాయాలు కల్పిస్తామని హామీ ఇచ్చారు. దీనివల్ల మానవ-వన్యప్రాణి సంఘర్షణలు తగ్గి, అటవీ సంరక్షణకు కూడా మేలు జరుగుతుందని అధికారులు పేర్కొన్నారు.