అమ్రాబాద్ ఎఫ్‌ఎస్‌ఓ శ్రీకాంత్‌పై డిఎఫ్‌ఓకు ఫిర్యాదు.. సిబ్బందిని బూతులు తిట్టారంటూ లేఖ

21, Apr 2026 Amrabad 176 Views

సిబ్బందిపై బూతు పురాణం.. అమ్రాబాద్ ఎఫ్‌ఎస్‌ఓ శ్రీకాంత్‌పై డీఎఫ్‌ఓకు ఫిర్యాదు!

అమ్రాబాద్: విధి నిర్వహణలో ఉన్న కింది స్థాయి సిబ్బందిని అసభ్య పదజాలంతో దూషించారనే ఆరోపణపై అమ్రాబాద్ ఫారెస్ట్ సెక్షన్ ఆఫీసర్ (FSO) ఎస్. శ్రీకాంత్ వివాదంలో చిక్కుకున్నారు. తమను నోటికొచ్చినట్లు బూతులు తిడుతూ, బెదిరింపులకు గురిచేశారని అటవీ శాఖ సిబ్బంది ఏ. విష్ణు మరియు పి. శ్రీనివాస్ జిల్లా అటవీ అధికారి (DFO) కి రాతపూర్వక ఫిర్యాదు చేశారు.

అసలేం జరిగిందంటే..: సిబ్బంది అందించిన ఫిర్యాదు లేఖ ప్రకారం.. ఈనెల 16వ తేదీ రాత్రి 7:11 గంటల ప్రాంతంలో అమ్రాబాద్ టైగర్ రిజర్వ్ (ATR) పరిధిలో ఒక ట్రాక్టర్ కలపతో వెళ్తోందని ఎఫ్‌ఎస్‌ఓ శ్రీకాంత్ సిబ్బందికి సమాచారం అందించారు. వారు చెక్ పోస్ట్ వద్ద తనిఖీలు చేపట్టారు. అయితే, కొద్దిసేపటికే అంటే 7:14 గంటలకు ఎఫ్‌ఎస్‌ఓ మళ్ళీ ఫోన్ చేసి, సమాధానం చెప్పేలోపే అత్యంత దారుణమైన బూతులు తిట్టడం ప్రారంభించారని బాధితులు ఆవేదన వ్యక్తం చేశారు.

అవమానకరంగా దూషణలు: "మీరు చెక్ పోస్ట్ వద్ద ఏం పీకుతున్నారు? బొక్కలో పడేస్తా.. నా బీపీ లేపకండి" అంటూ అసభ్య పదజాలంతో (బూతులు) దూషించారని లేఖలో పేర్కొన్నారు. రాత్రి 7:16 గంటలకు ట్రాక్టర్ రావడం, దానిని పట్టుకోవడం జరిగిందని.. పని చేస్తున్న తమను ఇలా కారణం లేకుండా బూతులు తిట్టడం వల్ల తీవ్ర మానసిక వేదనకు గురయ్యామని సిబ్బంది వాపోయారు.

చర్యలు తీసుకోవాలని డిమాండ్: గౌరవప్రదమైన ఉద్యోగంలో ఉండి, తోటి సిబ్బంది పట్ల అమానవీయంగా ప్రవర్తించిన ఎఫ్‌ఎస్‌ఓ శ్రీకాంత్‌పై తక్షణమే విచారణ జరిపి చర్యలు తీసుకోవాలని వారు డీఎఫ్‌ఓను కోరారు. అమ్రాబాద్ అటవీ ప్రాంతంలో అధికారుల తీరుపై సిబ్బంది బహిరంగంగా ఫిర్యాదు చేయడం ఇప్పుడు చర్చనీయాంశంగా మారింది.