అచ్చంపేటలో హస్తకళాకారులకు రూ. 5 లక్షల విలువైన పనిముట్ల పంపిణీ.. చేతివృత్తులకు సర్కార్ భరోసా!

11, Jun 2026 Achampet 176 Views

చేతివృత్తుల ద్వారానే ఆర్థిక స్వావలంబన.. అచ్చంపేటలో 50 మంది వెదురు హస్తకళాకారులకు రూ. 5 లక్షల విలువైన పనిముట్ల పంపిణీ!

అచ్చంపేట: గ్రామీణ ప్రాంతాల్లో అంతరించిపోతున్న చేతివృత్తులకు జీవం పోసి, హస్తకళాకారులను ఆర్థికంగా బలోపేతం చేయడమే ప్రభుత్వ లక్ష్యమని తెలంగాణ హస్తకళల డిపార్ట్‌మెంట్ అసిస్టెంట్ డైరెక్టర్  సువర్చల పేర్కొన్నారు. నాగర్ కర్నూల్ జిల్లా అచ్చంపేట పట్టణ కేంద్రంలోని శ్రీ శాలివాహన కుమ్మర సత్రంలో జిల్లా వ్యాప్తంగా ఉన్న వెదురు హస్తకళాకారులకు ఉచిత పనిముట్ల పంపిణీ కార్యక్రమం ఘనంగా నిర్వహించబడింది. ఈ కార్యక్రమానికి హస్తకళల డిపార్ట్‌మెంట్ అసిస్టెంట్ డైరెక్టర్  సువర్చల, ఏపీపీసీ (APPC) అసిస్టెంట్ డైరెక్టర్ శ్రీ విజయ సాగర్ రెడ్డి  ముఖ్య అతిథులుగా హాజరయ్యారు.

జిల్లాలోని కొల్లాపూర్, నాగర్ కర్నూల్, అచ్చంపేట, కల్వకుర్తి నియోజకవర్గాల నుండి వచ్చిన 50 మంది వెదురు హస్తకళాకారులకు రూ. 5 లక్షల విలువైన, 13 రకాల అధునాతన పనిముట్ల కిట్లను అధికారులు చేతుల మీదుగా అందజేశారు.

కళాకారుల ఉపాధికి ప్రత్యేక శిక్షణ: ఈ సందర్భంగా శ్రీమతి సువర్చల  మాట్లాడుతూ.. మినిస్టర్ ఆఫ్ టెక్స్టైల్స్, హస్తకళల డిపార్ట్‌మెంట్, మరియు ఆంధ్రప్రదేశ్ ప్రొడక్టివిటీ కౌన్సిల్ (APPC) సంయుక్త ఆధ్వర్యంలో ప్రకృతి సిద్ధంగా లభించే చెట్లు, మట్టి, రాళ్లు, లోహాలు, దారాలతో కళాఖండాలు సృష్టించే వారిని ప్రోత్సహిస్తున్నామని తెలిపారు. భారత ప్రభుత్వం గ్రామీణ ప్రాంత ప్రజలు స్వయం ఉపాధి సాధించేలా హస్తకళలలో ప్రత్యేక శిక్షణ ఇస్తోందని, ఈ పనిముట్లను సద్వినియోగం చేసుకుని మార్కెట్లో మంచి ఆదాయం పొందాలని ఆమె సూచించారు.

ప్రభుత్వ ఉచిత వసతులు – ఎగ్జిబిషన్ స్టాళ్లు: ఏపీపీసీ అసిస్టెంట్ డైరెక్టర్  విజయ సాగర్ రెడ్డి  మాట్లాడుతూ.. "హస్తకళాకారులు తయారు చేసిన వస్తువులను విక్రయించడానికి ప్రభుత్వమే ప్రత్యేక ఎగ్జిబిషన్లలో ఉచితంగా స్టాళ్లు ఏర్పాటు చేస్తుంది. ఈ ప్రదర్శనలకు వెళ్లే కళాకారులకు ప్రయాణ ఖర్చులతో పాటు, నిత్య భోజన, వసతి సౌకర్యాలను కూడా ప్రభుత్వమే భరిస్తుంది. రాబోయే రోజుల్లో వీరికి మరింత నైపుణ్యం పెంచేందుకు శిక్షణ శిబిరాలు, స్టడీ టూర్‌లు ఏర్పాటు చేస్తాం" అని ప్రకటించారు.

పర్యావరణ పరిరక్షణలో హస్తకళల పాత్ర: మాతృభూమి సంస్థ అధ్యక్షులు రమాకాంత్ మాట్లాడుతూ.. ప్రస్తుతం సమాజంలో ప్లాస్టిక్ వాడకం ఎక్కువై పర్యావరణ కాలుష్యం, అనారోగ్యం పెరుగుతున్నాయని, ఇలాంటి తరుణంలో పర్యావరణహిత వెదురు వస్తువులను ప్రోత్సహించడం అభినందనీయమన్నారు. తమకు ఉచితంగా కిట్లు అందజేసినందుకు జిల్లా అధ్యక్షులు కొండలయ్య  అధికారులకు ప్రత్యేక ధన్యవాదాలు తెలిపారు.

మాతృభూమి రూరల్ డెవలప్‌మెంట్ సొసైటీ సహకారంతో జరిగిన ఈ కార్యక్రమంలో హస్తకళల డిపార్ట్‌మెంట్ ప్రతినిధులు  జరూస్, సత్యనారాయణ, కోన తిరుపతయ్య, పులి మల్లేష్, మాతృభూమి ఫౌండర్ మంజుల, కోశాధికారి తోకల శ్రీదేవి, వివిధ మండలాల అధ్యక్షులు, క్రాఫ్ట్స్ మెన్, మహిళలు మరియు యువకులు పెద్ద సంఖ్యలో పాల్గొన్నారు.