జర్నలిస్టుల ఛలో ఢిల్లీ సెప్టెంబర్‌లో జంతర్ మంతర్ వద్ద IFWJ మహా ధర్నా | TWJF

09, Aug 2026 Achampet 176 Views

జర్నలిస్టుల సమస్యలపై "ఛలో ఢిల్లీ": సెప్టెంబర్ రెండో వారంలో జంతర్ మంతర్ వద్ద IFWJ మహా ధర్నా

హైదరాబాద్: దేశవ్యాప్తంగా వర్కింగ్ జర్నలిస్టులు ఎదుర్కొంటున్న సుదీర్ఘ సమస్యల పరిష్కారమే లక్ష్యంగా ఇండియన్ ఫెడరేషన్ ఆఫ్ వర్కింగ్ జర్నలిస్ట్స్ (IFWJ) పోరాటానికి సిద్ధమైంది. దేశ రాజధాని ఢిల్లీ కేంద్రంగా "ఛలో ఢిల్లీ" పేరుతో భారీ ఆందోళన చేపట్టాలని జాతీయ నాయకత్వం నిర్ణయించింది. సెప్టెంబర్ రెండో వారంలో ఢిల్లీలోని జంతర్ మంతర్ వద్ద జాతీయ స్థాయిలో ధర్నా నిర్వహించేందుకు ముమ్మర కసరత్తు ప్రారంభించింది.

TWJF స్పూర్తితో ఉద్యమ బాట పట్టిన IFWJ

జర్నలిస్టుల హక్కుల పరిరక్షణ, సంక్షేమం కోసం తెలంగాణ వర్కింగ్ జర్నలిస్ట్స్ ఫెడరేషన్ (TWJF) క్షేత్రస్థాయిలో సాగిస్తున్న నిరంతర పోరాటాలను IFWJ జాతీయ నేతలు ప్రత్యేకంగా ప్రశంసించారు. TWJF చూపిస్తున్న సమరశీల వైఖరి, ఉద్యమ స్పూర్తితోనే జాతీయ స్థాయిలో మళ్లీ ఆందోళనలు చేపట్టాలని నిర్ణయించినట్లు నాయకులు తెలిపారు.

ఈ జూమ్ సమావేశంలో TWJF రాష్ట్ర అధ్యక్షుడు మామిడి సోమయ్య పాల్గొని ప్రసంగించారు. మీడియా రంగంలో పెరిగిన పనిభారం, వేతనాల సమస్యలు, అక్రిడిటేషన్ నిబంధనల్లో సడలింపుల ఆవశ్యకతను మరియు రాష్ట్రంలో వర్కింగ్ జర్నలిస్టుల స్థితిగతులను ఆయన జాతీయ కమిటీ దృష్టికి తీసుకెళ్లారు. టీడబ్ల్యూజేఎఫ్ అందిస్తున్న సేవలు మరియు క్రియాశీలక భాగస్వామ్యాన్ని గుర్తించిన జాతీయ నేతలు TWJF కు కితాబు ఇచ్చారు.

త్వరలో రాంచిలో IFWJ జాతీయ సమావేశాలు

ఢిల్లీ ధర్నాకు సన్నాహకంగా మరియు ఉద్యమ దిశానిర్దేశం చేయడానికి త్వరలోనే జార్ఖండ్ రాజధాని రాంచిలో IFWJ జాతీయ సమావేశాలు ఏర్పాటు చేయనున్నారు. ఈ సమావేశంలో వివిధ రాష్ట్రాల జర్నలిస్ట్ ప్రతినిధులు పాల్గొని 'ఛలో ఢిల్లీ' ప్రణాళికను ఖరారు చేయనున్నారు.

జర్నలిస్టుల ప్రధాన డిమాండ్లు:

• జర్నలిస్ట్ ప్రొటెక్షన్ యాక్ట్: వర్కింగ్ జర్నలిస్టులపై దాడుల నివారణకు జాతీయ స్థాయిలో తక్షణమే భద్రతా చట్టం చేయాలి.

• రైల్వే పాస్‌ల పునరుద్ధరణ: జర్నలిస్టులకు గతంలో ఉన్న రైల్వే రాయితీ పాస్‌లను పునరుద్ధరించాలి.

• ఉద్యోగ భద్రత & పెన్షన్: ప్రింట్, ఎలక్ట్రానిక్ మరియు డిజిటల్ మీడియా విలేకరులకు స్పష్టమైన వేతన నియమావళి మరియు పెన్షన్ సౌకర్యం కల్పించాలి.

• ఆరోగ్య భద్రత: జర్నలిస్టులు మరియు వారి కుటుంబ సభ్యులకు సమగ్ర ఆరోగ్య భద్రతా పథకాలను అమలు చేయాలి.

సెప్టెంబర్‌లో జరగబోయే "ఛలో ఢిల్లీ" కార్యక్రమాన్ని విజయవంతం చేయడానికి ప్రతి రాష్ట్రం నుండి జర్నలిస్టులు పెద్ద ఎత్తున తరలిరావాలని IFWJ జాతీయ నాయకత్వం పిలుపునిచ్చింది.