తల్లిపాలే శిశువుకు సంపూర్ణ సురక్ష: నాగర్‌కర్నూల్ కలెక్టర్ హేమంత్ కేశవ్ పాటిల్

05, Aug 2026 Achampet 176 Views

తల్లిపాలే శిశువుకు సంపూర్ణ సురక్ష: నాగర్‌కర్నూల్ జిల్లా కలెక్టర్ హేమంత్ కేశవ్ పాటిల్

నాగర్‌కర్నూల్: ప్రపంచ తల్లిపాల వారోత్సవాల సందర్భంగా నాగర్‌కర్నూల్ జిల్లా కేంద్రంలో భారీ అవగాహన ర్యాలీ నిర్వహించారు. జిల్లా కలెక్టర్ హేమంత్ కేశవ్ పాటిల్, ఎమ్మెల్సీ కూచుకుళ్ల దామోదర్ రెడ్డి జెండా ఊపి ఈ ర్యాలీని ప్రారంభించారు.

ఈ సందర్భంగా కలెక్టర్ మాట్లాడుతూ.. తల్లిపాలే నవజాత శిశువుకు సంపూర్ణమైన ఆరోగ్య సురక్షను, రోగనిరోధక శక్తిని అందిస్తాయని తెలిపారు. బిడ్డ పుట్టిన అరగంటలోపే తల్లిపాలు అందించాలని, తొలి ఆరు నెలలు కేవలం తల్లిపాలు మాత్రమే పట్టాలని సూచించారు. ముర్రు పాలు (కొలస్ట్రమ్) శిశువుకు తొలి ప్రకృతిసిద్ధ టీకా వంటివని, తల్లిపాలు ఇవ్వడం వల్ల తల్లులకు రొమ్ము, గర్భాశయ క్యాన్సర్ల ముప్పు కూడా తగ్గుతుందని స్పష్టం చేశారు.

ప్రభుత్వ ఆసుపత్రుల్లో 97% ప్రసవాలు జరుగుతున్నప్పటికీ, తొలి అరగంటలో కేవలం 37% శిశువులకే తల్లిపాలు అందుతుండటం పట్ల కలెక్టర్ ఆందోళన వ్యక్తం చేశారు. ప్రతి నవజాత శిశువుకూ తొలి గంటలోనే పాలు అందేలా ఆశా, అంగన్‌వాడీ, వైద్య సిబ్బంది అవగాహన కల్పించాలని ఆదేశించారు. అత్యవసర సమయాల్లో సురక్షిత తల్లిపాలు అందించేందుకు నాగర్‌కర్నూల్, అచ్చంపేట ప్రభుత్వ ఆసుపత్రుల్లో 'తల్లిపాల బ్యాంకులు' (Milk Banks) ఏర్పాటు చేయనున్నట్లు కలెక్టర్ వెల్లడించారు. బస్టాండ్లు, ప్రభుత్వ కార్యాలయాలు, ఆసుపత్రుల్లో ప్రత్యేక పాలిచ్చే గదుల ఏర్పాటుకు చర్యలు తీసుకుంటామన్నారు. ఎమ్మెల్సీ దామోదర్ రెడ్డి, డాక్టర్ ఉషారాణి మాట్లాడుతూ "డబ్బా పాలు వద్దు - తల్లి పాలు ముద్దు" సందేశాన్ని ప్రతి ఇంటికీ చేర్చాలని పిలుపునిచ్చారు.