నాగర్‌కర్నూల్ గిరిజన స్కూళ్లలో అక్రమ డిప్యుటేషన్లు.. విచారణకు అడిషనల్ డైరెక్టర్ ఆదేశం

18, May 2026 Achampet 176 Views

నాగర్‌కర్నూల్ గిరిజన ఆశ్రమ పాఠశాలల్లో అక్రమ డిప్యుటేషన్ల పర్వం.. అడిషనల్ డైరెక్టర్‌కు ‘ఆర్టీఐఎస్ఎస్’ ఫిర్యాదు

హైదరాబాద్/నాగర్‌కర్నూల్, మే 18, 2026: నాగర్‌కర్నూల్ జిల్లా గిరిజన సంక్షేమ శాఖ పరిధిలోని ఆశ్రమ పాఠశాలల్లో నిబంధనలకు విరుద్ధంగా జరుగుతున్న అక్రమ, అశాస్త్రీయ ఉపాధ్యాయ డిప్యుటేషన్లపై రైట్ టు ఇన్ఫర్మేషన్ సేవా సొసైటీ (ఆర్టీఐఎస్ఎస్) సమర శంఖం పూరించింది. సొసైటీ జాతీయ అధ్యక్షుడు కె. బాబురామ్ నాయక్ ఆధ్వర్యంలో ప్రతినిధుల బృందం సోమవారం హైదరాబాద్‌లోని గిరిజన సంక్షేమ శాఖ కమిషనరేట్ కార్యాలయంలో అడిషనల్ డైరెక్టర్ శ్రీ వి. సర్వేశ్వర్ రెడ్డిని కలిసి రాతపూర్వక ఫిర్యాదు సమర్పించింది.

ఈ సందర్భంగా ఆర్టీఐఎస్ఎస్ జాతీయ అధ్యక్షుడు కె. బాబురామ్ నాయక్ మాట్లాడుతూ.. నాగర్‌కర్నూల్ జిల్లా గిరిజన సంక్షేమ అధికారి (డిటిడిఓ) నిబంధనలను పూర్తిగా పక్కనబెట్టి, కొందరు ఉపాధ్యాయుల వ్యక్తిగత అనుకూలతల (కన్వీనియన్స్) కోసం అక్రమంగా డిప్యుటేషన్లు ఇస్తూ గిరిజన విద్యార్థుల భవిష్యత్తుతో ఆడుకుంటున్నారని మండిపడ్డారు. కొన్ని పాఠశాలల్లో ఒకే సబ్జెక్టుకు చెందిన ఇద్దరు ముగ్గురు ఉపాధ్యాయులను ఒకే చోట వార్డెన్లుగా లేదా అదనపు సిబ్బందిగా కేటాయించడం వల్ల ప్రభుత్వ నిధులు దుర్వినియోగం అవుతున్నాయని ధ్వజమెత్తారు. మరోవైపు, మరికొన్ని స్కూళ్లలో అసలు సబ్జెక్ట్ ఫ్యాకల్టీ లేకుండా పోయి పాఠశాలలు మూతపడే పరిస్థితికి వచ్చాయని, దీనివల్ల ముఖ్యంగా పదవ తరగతి విద్యార్థుల ఫలితాలు దెబ్బతినే ప్రమాదం ఉందని ఆందోళన వ్యక్తం చేశారు.

బాలికల పాఠశాలల్లో పురుష సిబ్బందిపై ఆగ్రహం: కల్వకుర్తి, జంగంరెడ్డిపల్లి, మన్ననూర్, ఉడిమిల్ల, చెంచుగూడం, లింగాల, నార్లాపూర్ వంటి గిరిజన బాలికల పాఠశాలల్లో కేవలం మహిళా సిబ్బంది మాత్రమే ఉండాలన్న ప్రాథమిక నిబంధనను పక్కన పెట్టి, పురుష సిబ్బందిని కొనసాగించడం విద్యార్థినుల భద్రతకు ముప్పుగా మారిందని, వారి స్థానంలో వెంటనే మహిళా సిబ్బందిని నియమించాలని డిమాండ్ చేశారు.

అడిషనల్ డైరెక్టర్ సానుకూల హామీ: ఈ లోతైన ఫిర్యాదుపై గిరిజన సంక్షేమ శాఖ అడిషనల్ డైరెక్టర్ శ్రీ వి. సర్వేశ్వర్ రెడ్డి అత్యంత సానుకూలంగా స్పందించారు. గిరిజన విద్యార్థుల విద్యతో, బాలికల భద్రతతో ఆడుకుంటే ఎట్టి పరిస్థితుల్లోనూ సహించేది లేదని స్పష్టం చేశారు. నాగర్‌కర్నూల్ జిల్లాలో జరిగిన ఈ అక్రమ డిప్యుటేషన్లపై తక్షణమే లోతైన విచారణ జరిపించి, నిబంధనలకు విరుద్ధంగా ఉన్న పోస్టింగులను రద్దు చేస్తామని అధికారికంగా హామీ ఇచ్చారు. ఉపాధ్యాయులందరినీ వారి అసలు స్థానాలకు పంపుతామని స్పష్టం చేశారు.

అధికారి స్పందనపై హర్షం వ్యక్తం చేసిన బాబురామ్ నాయక్, ఒకవేళ చర్యలు తీసుకోవడంలో నిర్లక్ష్యం వహిస్తే కమిషనరేట్ ఆఫీస్ ముందు పెద్ద ఎత్తున నిరసనలు చేపడతామని హెచ్చరించారు. ఈ కార్యక్రమంలో గిరిజన సంఘాల నాయకులు, సొసైటీ ప్రతినిధులు పాల్గొన్నారు.