సత్తుపల్లి సింగరేణి ఓపెన్‌కాస్ట్‌లో డిప్యూటీ సీఎం భట్టి విక్రమార్క తనిఖీలు

23, Jul 2026 Achampet 176 Views

సత్తుపల్లి సింగరేణి ఓపెన్‌కాస్ట్‌ను పరిశీలించిన డిప్యూటీ సీఎం భట్టి విక్రమార్క: సంస్థను మరింత బలోపేతం చేస్తామనే హామీ

సత్తుపల్లి: ఖమ్మం జిల్లా సత్తుపల్లిలోని సింగరేణి ఓపెన్‌కాస్ట్ బొగ్గుగనిని తెలంగాణ రాష్ట్ర ఉప ముఖ్యమంత్రి మల్లు భట్టి విక్రమార్క క్షేత్రస్థాయిలో పరిశీలించారు. గనిలోకి వెళ్లిన ఆయన బొగ్గు లభ్యత, నాణ్యతా ప్రమాణాలు మరియు ఉత్పత్తి ప్రక్రియను ప్రత్యక్షంగా వీక్షించి, అనంతరం అధికారులతో సమీక్షా సమావేశం నిర్వహించారు.

ఈ సందర్భంగా ఉప ముఖ్యమంత్రి మాట్లాడుతూ.. "తెలంగాణ గుండెచప్పుడు సింగరేణి. 130 ఏళ్లకు పైగా సుదీర్ఘ చరిత్ర కలిగిన ఈ సంస్థతో తెలంగాణ ప్రజలకు విడదీయరాని భావోద్వేగ అనుబంధం ఉంది" అని పేర్కొన్నారు. సింగరేణి సంస్థను కాపాడుకుంటూ, మరింత బలోపేతం చేసి భావితరాలకు లాభదాయకమైన ప్రభుత్వ రంగ సంస్థగా అందించడమే తమ ప్రజా ప్రభుత్వ ముఖ్య లక్ష్యమని స్పష్టం చేశారు.

నేటి పోటీ ప్రపంచంలో సింగరేణి నిలదొక్కుకోవాలంటే అత్యుత్తమ నాణ్యత కలిగిన బొగ్గును ఉత్పత్తి చేయడంతో పాటు ఉత్పత్తి వ్యయాన్ని తగ్గించాల్సిన అవసరం ఉందన్నారు. బొగ్గులో మట్టి, రాళ్లు కలవకుండా ప్రతి లోడింగ్ పాయింట్ వద్ద నిరంతరం కఠిన పర్యవేక్షణ చేపట్టాలని అధికారులను ఆదేశించారు. రాబోయే పదేళ్ల విద్యుత్ అవసరాలను దృష్టిలో ఉంచుకుని సింగరేణి-జెన్‌కో సంయుక్తంగా దీర్ఘకాలిక ప్రణాళికను రూపొందించాలని, కొత్త కోల్ బ్లాక్‌ల సాధనలో రాష్ట్ర ప్రభుత్వం పూర్తి సహకారం అందిస్తుందని హామీ ఇచ్చారు. కేవలం బొగ్గు ఉత్పత్తికే పరిమితం కాకుండా సోలార్ ఎనర్జీ, క్రిటికల్ మినరల్స్, రేర్ ఎర్త్ మినరల్స్ వంటి భవిష్యత్ రంగాల్లోకి కూడా సింగరేణి విస్తరించాలని సూచించారు.