గిరిజన సంక్షేమ శాఖ డైలీ వేజ్ వర్కర్లకు సమాన వేతనం ఇవ్వాలి

06, Jun 2026 Achampet 176 Views

గిరిజన సంక్షేమ శాఖ డైలీ వేజ్ వర్కర్లకు సమాన వేతనాలు అమలు చేయాలి మంత్రుల హామీలు అమలు చేయకపోతే ఉద్యమ కార్యాచరణ ప్రకటిస్తాం: అచ్చంపేట సమావేశంలో హెచ్చరిక

అచ్చంపేట, జూన్ 6: నాగర్‌కర్నూల్ జిల్లా గిరిజన సంక్షేమ శాఖ హాస్టళ్లు, ఆశ్రమ పాఠశాలల్లో పనిచేస్తున్న డైలీ వేజ్ వర్కర్ల సమస్యల పరిష్కారం కోసం ప్రభుత్వం తక్షణ చర్యలు తీసుకోవాలని డైలీ వేజ్ వర్కర్లు డిమాండ్ చేశారు. అచ్చంపేట పట్టణంలోని గిరిజన సంక్షేమ శాఖ యూత్ ట్రైనింగ్ సెంటర్ (YTC) వద్ద నిర్వహించిన సమావేశంలో వర్కర్లు ఎదుర్కొంటున్న సమస్యలపై సుదీర్ఘంగా చర్చించి పలు కీలక నిర్ణయాలు తీసుకున్నారు.

గతంలో తమ న్యాయమైన డిమాండ్ల సాధన కోసం 45 రోజుల పాటు సమ్మె నిర్వహించిన విషయాన్ని నాయకులు గుర్తు చేశారు. ఆ సమయంలో తెలంగాణ రాష్ట్ర గిరిజన సంక్షేమ శాఖ మంత్రి, కమిషనర్ ఆధ్వర్యంలో జేఏసీ నాయకులతో చర్చలు జరిపి, మూడు నెలల్లో సమస్యలను పరిష్కరిస్తామని, సమాన పనికి సమాన వేతనం అమలు చేసే విధంగా కార్యాచరణ రూపొందిస్తామని హామీ ఇచ్చారని తెలిపారు. అయితే ఆ హామీలు ఇచ్చి చాలా కాలం గడిచినా ఇప్పటివరకు అమలు కాలేదని ఆవేదన వ్యక్తం చేశారు.

ముఖ్యంగా నాగర్‌కర్నూల్ జిల్లా డైలీ వేజ్ వర్కర్లకు ఇప్పటికీ జీవో నెం.64 ప్రకారమే కేవలం రూ.11,700 మాత్రమే చెల్లించడం వివక్షకు నిదర్శనమని విమర్శించారు. రాష్ట్రంలోని ఇతర జిల్లాల్లో కలెక్టర్ గెజిట్ ప్రకారం రూ.26,700 వరకు వేతనాలు అందుతుండగా, ఇక్కడ మాత్రం తక్కువ వేతనం ఇవ్వడం రాజ్యాంగ స్ఫూర్తికి విరుద్ధమని మండిపడ్డారు. ప్రభుత్వం ఇటీవల ప్రకటించిన పెరిగిన కార్మిక వేతనాలను తమకూ వర్తింపజేయాలని, లేనిపక్షంలో రాష్ట్రవ్యాప్త ఉద్యమం తప్పదని హెచ్చరించారు. జూన్ 10న హైదరాబాద్‌లోని సుందరయ్య విజ్ఞాన కేంద్రంలో నిర్వహించనున్న రాష్ట్ర సదస్సుకు అందరూ తరలిరావాలని పిలుపునిచ్చారు.