ఉప్పునుంతల: మా వడ్లు ఆ మిల్లుకు వద్దు.. సివిల్ సప్లై డీఎంకు ఉప్పరపల్లి రైతుల వినతి

23, May 2026 Uppununthala 176 Views

ఆ మిల్లుకు ఇస్తే మునిగిపోతాం’.. సివిల్ సప్లై డీఎంకు ఉప్పరపల్లి రైతుల వేడుకోలు!

ఉప్పునుంతల: నాగర్‌కర్నూలు జిల్లా ఉప్పునుంతల మండలం ఉప్పరపల్లి గ్రామ పరిధిలోని ఐకేపీ (IKP) కొనుగోలు కేంద్రంలో ధాన్యం అప్పగింతల వ్యవహారంపై రైతులు తిరుగుబాటు జెండా ఎగరేశారు. తాము కష్టపడి పండించిన వరి ధాన్యాన్ని స్థానిక ‘ఏఎంఆర్ (AMR) ఆగ్రో ఇండస్ట్రీస్’ కు కాకుండా, ఈసారి వేరే రైస్ మిల్లుకు కేటాయించాలంటూ గ్రామ రైతులు, ఐకేపీ మహిళా సంఘాల ప్రతినిధులు సంయుక్తంగా నాగర్‌కర్నూలు జిల్లా సివిల్ సప్లైస్ జిల్లా మేనేజర్ (DM) గారికి బహిరంగ విజ్ఞప్తి చేశారు.

ఈ మేరకు గ్రామ రైతులు ఒక కీలక తీర్మానాన్ని ఆమోదించి అధికారుల దృష్టికి తీసుకెళ్లారు. గత నాలుగు సంవత్సరాలుగా తాము పండించిన రబీ, ఖరీఫ్ వరి ధాన్యాన్ని నిరంతరాయంగా ఏఎంఆర్ ఆగ్రో ఇండస్ట్రీస్ రైస్ మిల్లుకు ఇవ్వడం వల్ల తాము తరుగు, ధర తగ్గింపు, సకాలంలో బిల్లులు రాకపోవడం వంటి రకరకాల కారణాలతో తీవ్రంగా ఆర్థికంగా నష్టపోయామని రైతులు ఆవేదన వ్యక్తం చేశారు. ప్రతి ఏటా ఒకే మిల్లు యజమానుల చేతిలో మోసపోతూ సాగు పెట్టుబడులు కూడా రాక అప్పులపాలవుతున్నామని వాపోయారు.

ఈ నేపథ్యంలో, ప్రస్తుత యాసంగి (రబీ) సీజన్‌లో పండించిన వరి ధాన్యాన్ని సదరు పాత మిల్లుకు పంపే ప్రసక్తే లేదని గ్రామస్థులు భీష్మించుకు కూర్చున్నారు. మహిళా సంఘాల సభ్యులు, రైతులు కలిసి తీసుకున్న ఏకగ్రీవ తీర్మానం మేరకు.. ఈ సంవత్సరం తమ ధాన్యాన్ని తక్షణమే వేరే ఏదైనా నమ్మకమైన బాయిలర్ లేదా రా రైస్ మిల్లుకు తరలించేలా ట్యాగింగ్ ఉత్తర్వులు ఇవ్వాలని డిమాండ్ చేశారు. జిల్లా సివిల్ సప్లై అధికారి (DM) గారు పెద్ద మనసుతో స్పందించి, తమ విజ్ఞప్తిని మన్నించి యుద్ధప్రాతిపదికన వేరే మిల్లును కేటాయించి ఉప్పరపల్లి అన్నదాతలను ఆదుకోవాలని వేడుకుంటున్నారు.